Efektivi i Policisë, Myrteza Mehmeti, do të përballet ne Gjykatën e Lezhës me akuzën e “Kryerjes së veprimeve arbitrare”, pasi gjatë arrestimit për lëndë narkotike dhe armë të ftohtë, keqtrajtoi 21- vjeçarin Aldi Rama, i cili në muajin shtator të vitit 2021 ekzekutoi oficerin e Krimeve në Policinë e Lezhës, Saimir Hoxha, dhe më pas u vetëvra.
Dosja penale e hetuar nga prokurori Françesk Ganaj, ka kaluar për gjykim themeli në Gjykatën e Lezhës, pasi disa seancave gjyqësore paraprake. Vendimi u mor nga gjyqtari Ilir Përdeda, ndërsa vetë i pandehuri ka mbajtur qëndrim mohues në lidhje me akuzën e ngritur ndaj tij, por organi i akuzës arriti të provojë se polici e ka keqtrajtuar 21-vjeçarin Aldi Rama.
Organi i akuzës u vu në lëvizje dhe regjistroi procedim penale, pas kallëzimit të bërë nga 21- vjeçari Aldi Rama me pretendimin se ishte dhunuar e keqtrajtuar nga uniformat blu, kur u arrestua me lëndë narkotike dhe armë të ftohtë.
Në lidhje me rastin u kryen një sërë veprimesh hetimore, por vetëm për njërin nga 3 efektivet e Policisë të kallëzuar nga i riu u arrit të provohet se ka konsumuar elementë të veprës penale, për të cilën është ngritur dhe akuza.
VRASJA E EFEKTIVIT
Më 28 shtator të vitit 2021, Aldi Rama u bë protagonist i një krimi të rëndë, duke ekzekutuar me armë zjarri oficerin e Policisë së Lezhës Saimir Hoxha, teksa ky i fundit bashkë me dy kolegë të tij po ktheheshin nga një aksion anti-kanabis në Ishull-Lezhë.
Oficeret e Policisë ndaluan për kontroll makinën në të cilën ndodhej Aldi Rama bashkë me dy shokë të tij, por sapo i oficeri Saimir Hoxha i ka kërkuar mjetin e identifikimit Ramës, ai e qëlloi me armë zjarri, duke e lënë të vdekur në vend.
Pas ngjarjes i riu arriti të largohet dhe gjatë operacionit policor për kapjen e tij qëlloi veten me pistolete, duke mbetur i plagosur rëndë dhe një ditë më pas ndërroi jetë në Spitalin e Traumës në Tiranë. Mllefi që kishte krijuar ndaj uniformave blu, duket se e nxitën të riun të ndërmarrë këtë akt të rëndë me viktimë një oficer policie.